Lilja Mósesdóttir, hagfræðingur, hefur ákveðið að bjóða sig fram í 2. sæti í forvali Vinstri grænna á framboðslista flokksins í Reykjavíkurkjördæmununum.

Framboðstilkynning Lilju

Tilkynning Lilju Mósesdóttur um framboð í 2. sæti í forvali Vinstrihreyfingarinnar  – græns framboðs í Reykjavíkurkjördæmunum tveimur sem fram fer 7. mars n.k.:

Lilja Mósesdóttir hagfræðingur stefnir á 2. sæti VG í Reykjavík

Eftir nokkra umhugsun hef ég undirrituð, Lilja Mósesdóttir, ákveðið að bjóða mig fram til starfa fyrir Vinstrihreyfinguna  – grænt framboð og svara þar með kalli fólksins í landinu um endurnýjun á sem flestum sviðum samfélagsins. Ég tel að menntun mín og starfsreynsla á sviði efnahags-, atvinnu- og velferðarmála sé góður grunnur fyrir endurreisnarstarfið sem framundan er í íslensku samfélagi. Slíkt endurreisnarstarf þarf að byggja á nýjum gildum, gagnsæi, fagmennsku og lýðræðislegum vinnubrögðum í atvinnulífinu, stjórnsýslunni og stjórnmálum. Fjármálakreppan hefur opinberað nauðsyn þess að gert verði upp við tímabil sérhagsmuna og gegndarlausrar einstaklings- og neysluhyggju. Brýnt er að þessar aðstæður verði nýttar til að koma hér á samfélagi, þar sem lögð er áhersla á samstöðu og réttláta skiptingu byrðanna sem fjármálakreppan hefur og mun leggja á fólkið í landinu. Áherslur mínar og framtíðarsýn ríma vel við meginstefnumál Vinstrihreyfingarinnar  – græns framboðs um jöfnuð, kvenfrelsi, frið og sjálfbæra þróun. Það er mikilvægara en nokkru sinni að slíkar áherslur leiði okkur inn í framtíðina.

Ég er með doktorspróf í hagfræði frá Bretlandi og hef starfað sem hagfræðingur og háskólakennari hér á landi og erlendis. Undanfarin ár hef ég m.a. starfað sem prófessor við Háskólann á Bifröst, hagfræðingur ASÍ, ráðgjafi fyrir Grænlensku heimastjórnina og sem sérfræðingur við Háskólann í Luleaa í Svíþjóð. Ég hef tekið þátt í og stjórnað umfangsmiklum evrópskum rannsóknarverkefnum á sviði vinnumarkaðs- og velferðarmála. Auk þess hef ég setið í stjórn fyrirtækis og í stjórn norrænnar rannsóknarstofnunar ásamt því að hafa átt sæti í ýmsum nefndum á vegum hins opinbera.

Eftir fall bankanna hef ég tekið þátt í starfi grasrótarhópa eða hinni svokölluðu búsáhaldabyltingu og m.a. talað á borgarafundum og mótmælafundi Radda fólksins á Austurvelli. Ég starfaði með Kvennalistanum á sínum tíma og hef, eftir að hann var lagður niður, leitast við að styðja við kvennahreyfinguna í landinu með því að miðla af þekkingu minni á m.a. launamun kynjanna og stöðu kynjanna í þekkingarsamfélaginu og á vinnumarkaði.

Maki minn er Ívar Jónsson, forstöðumaður þjóðdeildar Landsbókasafnsins, og sonur okkar er Jón Reginbaldur, menntaskólanemi. Ég ólst upp í Grundarfirði en bý ásamt fjölskyldu minni í Breiðholtinu í Reykjavík. Ég sækist eftir 2. sæti í forvali Vinstrihreyfingarinnar  – græns framboðs í Reykjavík.

Lilja Mósesdóttir