Smásmugan sá það einhverstaðar haft eftir hæstvirtum iðnaðarráðherra, Össuri Skarphéðinssyni, að hann væri tilbúinn að ræða fjárfestingasamning líkt og hann hefur gert við Century Aluminum við alla.



Smásmugan hefur mikla drauma um framtíð Smugunnar. Hana dreymir um að Smugan verði fjölmiðlaveldi. Hana dreymir um að í Smugunni starfi 4000 manns. Hana dreymir um Smugan skapi tugi, ef ekki hundruð, eða þúsundir afleiddra starfa. En það eina sem stendur í vegi fyrir því að þessi draumar rætist er skortur á fjármagni – enginn vill fjármagna drauma hennar.



Smásmugan blikkar nú auðmjúkum augum til hæstvirts Iðnaðarráðherra, Össurar Skarphéðinssonar, í von um fjárfestingasamning. Ef Smásmugan gæti veifað slíkum samningi framan í fjármagnseigendur víða um heim myndu þeir ekki hika við að lána henni fyrir draumum hennar. Hver gæti slegið hendinni á móti því að lána Smásmugunni þegar hún hefur loforð um skattaafslátt, ívilnanir og ríkistyrki í vasanum?



Það eina sem Smásmugan þyrfti að varast er að þeir komist í efnahagsreikninga hennar eða frétti þeim miklu erfiðleikum sem nú steðja að Íslenskum fjölmiðlum.