Ófriðarbálið sem brennur innan Vinstri hreyfingarinnar græns framboðs hefur nú breiðst út til Samfylkingarinnar. Hún stendur í björtu báli og ráðherrar hennar eru kaghýddir á torgum borgarinnar í skini loganna.

Þetta fullyrðir Birkir Jón Jónsson sem steig nokkur létt danspor í pontu á Alþingi í gær í umræðum um atvinnumál. Það er kátt í höllinni við Austurvöll og Sigmundur Ernir og Ragnheiður Elín snerust á dansgólfinu við undirleik Samtaka atvinnulífsins.  

Birki Jóni finnst líka gaman að Katrín Júlíusdóttir skuli vera hýdd. Ekki vegna þess að hann eigi neitt sökótt við hana. Nei, hann trúir því og treystir að henni finnist í hjarta sínu svo leiðinlegt að vera ekki framsóknarmaður.

Steinsmugan er alsæl. Framsóknarmenn allra flokka vilja taka saman höndum í atvinnumálunum,  ryðja úr vegi lögum og reglugerðum virkja allar rennandi sprænur, drekkja hálendinu og sveitunum og reisa reykspúandi álver sem næst íbúabyggð. Þá má ekki gleyma spilavíti fyrir Breta og Hollendinga í gömlu heilsugæslustöðinni.

 Það er engu líkara en það sé fara af stað ný menningarbylting á Íslandi undir merkjum Framsóknarflokks og Sjálfstæðisflokksins.

Og boðskapurinn fer sem eldur í sinu um landið þótt nokkurar beljusálir og endurskoðunarsinnar þumbist og þráist við.

Leyfið þúsund blómum að blómstra, sagði Maó.

Gemmér, þúsund milljónir, mig langar í einkaspítala, segja íslensku varðliðarnir.