Þráinn Bertelsson tilkynnti við upphaf þingfundar klukkan 10.30 að  hann væri genginn til liðs við Vinstri hreyfinguna grænt framboð. Þráinn sagði þó að hann myndi halda trúnað við þá kjósendur sem gerðu hann að fulltrúa sínum í Reykjavík og þá stefnuskrá Borgarahreyfingarinnar sem frambjóðendur hennar lofuðu flokki sínum og kjósendum í aðdraganda síðustu kosninga. ,,Lýðræðisumbætur og jöfnuður í stað mismununar í krafti auðs og valda eru mínar grundvallarhugsjónir í stjórnmálum. Innan vébanda Vinstrihreyfingarinnar – græns framboðs skynja ég einlægan vilja til að stefna í þessa átt. Ég hlakka til samstarfsins,” segir í yfirlýsingu Þráins.

 Hér á eftir fer yfirlýsing Þráins vegna málsins.

,,Samkvæmt gildandi hefðum er stjórnmálastarf á Alþingi og í fjölmiðlum liðsíþrótt þar sem keppt er í flokkum en ekki frjáls einstaklingsíþrótt. Með þetta í huga hef ég ákveðið að bregða búi sem minnsti minnihluti á Alþingi, eini þingmaðurinn utan flokka, og ganga í lið með Vinstrihreyfingunni – grænu framboði.

Þá sem gerðu mig að fulltrúa sínum í Reykjavík fullvissa ég um að hér eftir sem hingað til mun ég halda trúnað við þá stefnuskrá Borgarahreyfingarinnar sem frambjóðendur hennar lofuðu flokki sínum og kjósendum í aðdraganda síðustu kosninga. Sú stefnuskrá byggðist að verulegu leyti á kröfum um nýja stjórnarskrá, stjórnlagaþing, þjóðfund, þjóðaratkvæðagreiðslur, persónukjör og fleiri lýðræðisumbætur sem tekist hefur að koma á dagskrá Alþingis, auk þess sem boðað hefur verið til Stjórnlagaþings, þannig að þess má vænta að hávær krafa og öflug barátta Borgarahreyfingarinnar á þessu grundvallarsviði stjórnmála skili verulegum árangri.

Við þetta tækifæri vil ég ítreka enn og aftur áskorun mína á ríkisstjórnina að færa höfuðstól verðtryggðra húsnæðislána einstaklinga aftur til verðlags janúar-mánaðar 2008 – þó með þeim hætti að enginn fá hærri niðurfellingu en 15 milljónir króna.

Innan VG mun ég halda áfram baráttu fyrir eignarhaldi þjóðarinnar á auðlindum Íslands, lýðræðisumbótum og hagsmunum almennings.

Sem betur fer hafa skref verið stigin í jafnréttismálum í þjóðfélaginu. Reynt hefur verið að jafna hlut fólks þannig að það þurfi ekki að gjalda fyrir kynferði sitt, trúarskoðanir, litarhátt eða kynhneigð.

Aðalverkefnið situr samt á hakanum og það er að auka hinn raunverulega jöfnuð í samfélaginu. Í okkar samfélagi eru hinir ríku jafnari en aðrir. Af hverju skyldi fíknin í að græða peninga vera meira metin en gáfur, menntun, góðmennska ellegar hæfileiki til að kenna, hjúkra eða gleðja? Hamingja í þjóðfélagi byggist ekki eingöngu á vergri þjóðarframleiðslu heldur á því að gæðum landsins sé réttlátlega skipt.

Eitt af hverjum tíu börnum á Íslandi tilheyrir fjölskyldu sem lifir undir fátæktarmörkum. Hver vill hafa þetta svona? Er ekki komið nóg af ójöfnuði í þessu litla landi?

Mitt svar er afdráttarlaust. Ég vil byggja hér upp þjóðfélag þar sem frelsi einstaklinganna byggist á samtakamætti, samábyrgð og kærleika en ekki á eiginhagsmunabaráttu, sundrungu og græðgi.

Lýðræðisumbætur og jöfnuður í stað mismununar í krafti auðs og valda eru mínar grundvallarhugsjónir í stjórnmálum. Innan vébanda Vinstrihreyfingarinnar – græns framboðs skynja ég einlægan vilja til að stefna í þessa átt. Ég hlakka til samstarfsins.