,,Það er varasamt að stjórnendur geti einfaldlega fært til reiti á skipurit og þannig klippt út vernd trúnaðarmanna,“ segir Stefán Pálsson trúnaðarmaður og fyrverandi starfsmaður Orkuveitunnar.

 „Það hefur kvarnast verulega úr vernd trúnaðarmanna, en Starfsmannafélag Reykjavíkur mun mótmæla þessum uppsögnum. Stjórnendur Orkuveitunnar standa fast á sínu og segja að þeim sem sagt sé upp, sinni starfsemi sem verði hætt. Yfirleitt eru trúnaðarmenn þó fluttir til og sinna öðrum störfum ef mögulegt er.

Í mínu tilviki hefur fyrirtækið ákveðin rök fyrir hendi. Ég var safnvörður minjasafns og sá um kynningu fyrir börn, þeirri starfsemi var hætt. Í öðrum tilvikum er augljóst að verkin verða enn unnin. Bæði trúnaðarmenn og varatrúnaðarmenn voru látnir fara. Þetta fólk starfaði meðal annars við skjalavörslu, umsjón með árskýrslum, auglýsingum og bilannatilkynningar. Allt verk sem verða áfram unnin.“

Stefán er að eigin sögn orðinn frægasti atvinnuleysingi Íslands, hálfum sólarhring eftir að honum var ásamt sextíu og fimm öðrum sagt upp.  „Það er auðvitað undarleg staða að vera trúnaðarmaður í fyrirtæki sem maður starfar ekki við. Ég get ekkert sinnt hlutverkinu, það er búið að loka öllu eins og tölvupóstum og slíku. Ég geri ráð fyrir að við fundum eitthvað og gerum það sem við getum, þangað til nýir trúnaðarmenn hafa verið skipaðir. Ég vil sem minnst hafa skoðun á minni uppsögn en það er sérstaklega hart að opinbert fyrirtæki fari fram í að veikja stöðu verkalýðshreyfingarinnar.“

Stefán skilur ekki hvers vegna fólki er ekki gert kleift að ljúka þeim verkefnum sem það er að sinna. „Það er mjög undarlegt að segja fólki upp og gera því að fara nánast strax. Þetta er einhver stefna sem kemur frá bönkunum, allt í einu er litið á starfsmann sem sagt er upp sem mögulega hættu, eins og allir fyllist hefndarhug og steli milljóna upplýsingum. Flestir eru stoltir af sinni vinnu og vinna hana vel. Það er mun eðlilegra að fólk geti klárað sín verkefni  og hætt með reisn. Ég trúi ekki að fólk vilji svona vinnubrögð sem reglu á vinnumarkaði.“

Atli@smugan.is