Árni Finnsson formaður Náttúruverndarsamtaka Íslands segir viðbrögð Einars K. Guðfinnssonar fyrrverandi sjávarútvegsráðherra við því að Náttúruverndarsamtökin hafi rætt við Bandaríska sendiráðið um hvalveiðar, álíka vitlaus og þegar Landsvirkjun og stjórnmálamenn máttu makka við Alcoa en Náttúruverndarsinnar voru sakaðir um að ógna þingræðinu og fullveldi Íslands ef þau leituðu stuðnings hjá alþjóðlegum umhverfisverndarsamtökum.

Einar K. Guðfinnsson sagði í samtali við Ríkisútvarpið í hádeginu að það væri reginhneyksli að almannasamtök makki við erlend stjórnvöld. til að koma höggi á löglega starfsemi. Fram kemur í WikiLeaks skjölunum að Árni Finnsson hvatti Bandaríska sendiráðið til að bregðast við ákvörðun Íslands um hvalveiðar. Bandaríski sendiherrann sér beitti sér fyrir harðorðum mótmælum sendiherra nokkurra erlendra ríkja við hvalveiðum Íslendinga. Einar K. Guðfinnsson, sagði vinnubrögðin forkastanleg og í raun ótrúlegt að þau gangi svo langt sem raun ber vitni.Í WikiLeaks skjölunum kemur ennfremur fram að stuðningur Einars K. Guðfinnssonar hafi einkum helgast af þrennu að mati Bandaríska sendiráðsins: Atkvæðaveiðum, að koma höggi á Alþjóðahvalveiðiráðið og notfæra sér málið til að grafa undan hugsanlegri aðildarumsókn að ESB.