„Áttatíu og tvö þúsund kjósendur voru sviptir kosningarétti sínum. Þeir voru sviptir helgasta rétti lýðræðisins. Fólk fór erindisleysu á kjörstað.“ segir Ómar Ragnarsson einn  ógiltra stjórnlagaþingmanna. Hann segist ekki hafa fundið neina hliðstæðu um álíka ákvörðun. „Ég tel ákvörðun hæstaréttar verulega ábótavant, sérstaklega þegar kemur í ljós að það vantar mikivæg gögn og rannsóknir, það er fásinna þegar svo stór ákvörðun er tekin,“ segir Ómar.  Hópur ógiltra stjórnlagaþingsfulltrúa ætla að leggja fram formlega kröfu um endurupptöku á ákvörðun á Hæstaréttar um að ógilda stjórnlagaþingskosningarnar. Líklegast þykir að farið verði fram á endurupptöku á þeim forsendum að Hæstiréttur hafi ekki sinnt rannsóknarskyldu sinni. Smugan greindi frá því fyrir helgi að óformlegur hópur lögfræðinga og ógiltra stjórnmálamanna leiti leiða til að fá ákvörðun Hæstaréttar hnekkt.

Ómar segir sjálfsagt að fólk nýti andmælarétt sinn og telur að mikill meirihluti ógiltra stjórnlagaþingmanna styðji viðleitni til að fá ákvörðun Hæstaréttar hnekkt. „Við hittumst í gær og ræddum þetta, ekki öll en mörg. Það var engin atkvæðagreiðsla enda er það réttur hvers og eins að andmæla,“ segir Ómar og tekur fram að kjósendur geti gert slíkt hið sama. „Því oftar sem ég fer í gegnum dóminn og les hann, því meira verði ég undrandi á þessum úrskurð,“ segir Ómar og bendir á að í ákvörðun Hæstaréttar sé orðunum „þar sem það á við“ sleppt í tilvitnun dómsins til laga um kosningar til Stjórnlagaþings.

„Aðalmálið eru þessi orð. Það stendur í lögunum að það sem ekki komi fram í nýju lögunum skuli tekið úr almennum kosningalögum, en aðeins það sem það á við.“ Hann segir Hæstarétt hafa horft framhjá veigamiklum atriðum eins og hvers eðlis þessi kosning var frá venjulegum kosningum. „

Smugan sagði frá því í morgun að hvorki fyrrverandi formaður landskjörstjórnar né innanríkisráðuneytið kannaðist við að þeirri aðferð hefði verið beitt sem Hæstiréttur lýsir sem forsendu þess að auðveldlega hafi verið að rekja kjörseðla til kjósanda.

Atli@smugan.is