,,Búist er við því að veidd verði a.m.k. 400.000 tonn  á yfirstandandi loðnuvertíð og útflutningsverðmætið verði 20 milljarðar króna,” segir Kristinn H. Gunnarsson fyrrverandi alþingismaður. ,,Sjávarútvegsráðherrann telur að það verði jafnvel meira eða á þriðja tug milljarða króna. Þessi miklu verðmæti og væntanlegur ofurhagnaður skiptast á milli útgerða aðeins 23 skipa. Þeir fáu sem eiga fyrirtækin verða loðnir um lófana.”

Kristinn H. Gunnarsson segir á heimasíðu sinni að ríkið fái eðlilega sinn hlut sem eigandi auðlindarinnar, en það sé mjög tillitsamt við útgerðarmennina 23 á þessum erfiðum tímum.

 ,,Veiðigjaldið er 0,946 kr/kg loðnu. Þetta gera 378 milljónir kr. fyrir öll 400 þús tonnin eða innan við 2% af áætluðu útflutingsverðmæti. Það er sérlega hóflegt að greiða aðeins 378 mkr í veiðigjald af útgerð sem mun líklega skila a.m.k. 7 milljarða króna í hagnað fyrir afskriftir og fjármagn. Að meðaltali verður hreinn hagnaður 300 mkr. af veiðum hvers skips sem skiptist milli veiða og vinnslu. Það er líka hægt að meta greiðslugetuna með því að skoða það verð sem útgerðarmenn sjálfir greiða fyrir veiðiréttinn. Umtalsverð viðskipti hafa átt sér stað með loðnuheimildir. Á síðasta fiskveiðiári voru rúmlega 27% af varanlega kvótanum seld, en engar upplýsingar er að finna um verðið. Það væri fróðlegt að það yrði birt.”